Madaxweyne Donald Trump oo Ku Hanjabay Inuu Burburin Doono Iiran Aysanna Cid Dambe U Hanjabi Doonin.

Maalmo kadib, markii uu Donald Trump sheegay inuu isku diyaarinayo Wdaa-hadal uu la galo Iiraan ayaa waxa uu haddana soo saaray Cabsi-gelin toos ugu socota Iiraan, isagoo sheegay in Jamhuuriyadda Islaamiga ee Iiraan la burburin doono.

Qoraal uu soo dhigay bartiisa Twitter-ka waxa uu Madaxweynaha Maraykanka ku sheegay haddii ay Iiraan doonayso dagaal, taasi waxay rasmi ahaan noqon doontaa dhamaadka Iiraan, waa sida uu hadalka u dhigay.

Waxa uu sii raaciyey in Iiran la burburin doono haddii ay soo weeraraan Danaha Maraykanka ee Gobalka, wuxuuna ugu baaqay Iiraaniyiinta inaysan mar kale cabsi-gelinin Maraykanka.

Dhanka kale, Gantaal ayaa waxa uu ku habsaday meel ku dhow Dhismaha Safaaradda Maraykanka ku leedahay Deegaanka Khadka Cagaaran ee caasimadda dalka Iraq ee Baqdaad.

Sarkaal u hadlay Waaxda Arrimaha Dibedda Maraykanka ayaa xaqiijiyey inuu Gantaal ku habsaday meel ku dhow Dhismaaha Safaaradooda, balse waxa uu sheegay inuusan wax khasaaro ah geysanin.

Wakaallaadda Wararka Iraq ayaa sheegtay in Gantaal noociisu yahay Katyuusha uu ku qarxay gudaha Deegaanka Khadka Cagaaran meel wax yar u jirta Safaaradda Maraykanka.

Be the first to comment

Leave a Reply

Your email address will not be published.